| Одржана конференција за печат: Децентрализацијата - можност за подобрување на меѓуетничките односи во општините Кичево, Вранештица и Другово |
|
|
|
Фондацијата Институт отворено општество – Македонија во соработка со Здружението на граѓани за поддршка на меѓуетнички дијалог и развој на заедницата „Заеднички вредности“ и Центарот за развој на заедницата - Кичево на 15.07.2008 год. со почеток во 11:00 часот организираше конференција за печат со наслов „Децентрализацијата - можност за подобрување на меѓуетничките односи во општините Кичево, Вранештица и Другово“. Конференцијата се одржа во рамки на проектот „Живеење во мултиетничка средина – граѓани со еднакви права, можности и заштита“ финансиран од Европската комисија и ФИООМ.
Целта на настанот беше да се информира локалната јавност за досегашното следење на работата на локалната администрација во општините Кичево, Вранештица и Другово во поглед на спроведувањето на меѓународното и домашното законодавство поврзано со правата на немнозинските етнички заедници и соодветната и правичната застапеност во институциите. Воедно, беше презентиран шестмесечниот извештај за периодот јануари-јуни 2008 год. кој ги анализира состојбите во областите на безбедноста, правото на еднаквост, образованието, правичната застапеност, толеранцијата, разбирањето и соработката, социјалните односи и улогата на граѓанските организации. Изјава во рамките на конференцијата за печат дадоа Елизабета Ристеска, локален координатор на активностите на проектот за подрачјето на Кичево, Исмет Балажи и Нермина Фазлијоска, членови на локалниот мониторинг тим за кичевскиот регион. На конференцијата за печат присуствуваа новинари/дописници на ТВ Гура, ТВ Ускана, вториот канал на МТВ, МИА, Канал 77, весниците Дневник и Коха. Конференцијата се одвиваше на македонски и делумно на албански јазик. |
